E-reunion: alon kozé zanfèr dann nout péi Larénion.

Bess bann pri!.
Sominn-si i koz touzour si la bèss bann pri, mé sé in nafèr i trouv pa lobout, dopi la libéralizasyon bann pri sé bann gro patron la ginyé.
Na ankor domoune i kri si radyo po larg zot kolèr, afors antann ké lé zot i fé, é antann boudin kwi lé pa po sa nou wa avansé.
Aforstan konm i di la kord wa kasé, dé tout fason nou lé dann in péi ousa sé bann koloniyalis i diriz. Fo biyn dir ké lo bann paran dé so bann dirizèr té groblan navé zésklav, zot la pi fèr larzan si lodo bann zèklav po zordi zot ti zanfan dirizé.
AMA dann nout péi.
So madam la i sort dann péi lé Zind, èl i viyn dann nout péi po partaz son lamour i paré! Li pass si koté Sin-Pir aswar 02 avril si koté zimnaz Tèrsint, apréla li sora si koté lwès, po inn fwa i pass an promiyé dann la sid.
Otism.
Si koté Tanpon so samdi 04 avri banna i organiz sann inndé zasosyasyon in zourné po fé konèt kosa ilé so maladi. Aparaman si koté Tanpon bann zorganis i okip domoune lé andikapé i bouz, viké sominn dèrnyé banna la organiz in nafèr (29 mars) si koté Trwa-mar).
Bank.
Domoune i kontiniyé kriyé bann bank i kontinyé arnak azot si bann fré,azio,fré i koné pa ousa i sort. Dapré ski di bann fré la bank i dépass pli de 144% par rapor la Frans, domoune i trouv pa lo bout, po kontrol bann lé dir sé zot na lo bann klé.
Dapré ski di sé plito bann domoune na pwin tro larzan i giny lo sok. Sé konm bann lisiyé si ou dwa 1€ zot i mèt 100€ de fré é la lo moune i giny pi péyé. 2 ankor dapré ski di bann gran zantropriz lé ilé de mèss sann zot " fo biyn fé travay bann ti kamarad"
Internèt :
Sa sé in nafèr a kousir domoun i tonm dann trin bann vandèr. Dann sak sipèrmarsé, sak kwin dri banna lé la. Lé vré lé bann zofr lé atiran mé lo problinm sé sak zot i propoz lé dann la pli par lo tan pa posib.
Si lo pératèr té la avan zot i propoz pa sèrtin sèrvis konm bouké tv si intèrnèt sé ké i pé pa. Avan prann in labonman miyé vo biyn réflési, si ou abit dann in troud-bébèt atann pa aou giny 3G minm lo EDGE, ou minm lo 8 méga
Pars la konm ganmoun i di ou pé bat out ki kont in ros ziska i siny.

Pakapab lémor san éséyé.Sa in nafèr tout domoune i koné pakapab lé mor san éséyé, so kozman la lé tré intérésan po dir ké si ouésèy pa ou giny arpa fé, mé sé osi lé a doubl transan é lé plito déstiné a domoune lé plito détèrminé.
Pokosa so E ZOURNAL?
Lo E zournal li minm lé déstiné a tout domoun, minm sat i fé siyé azot war ké na nafèr an kréol klé si lo wèb. Konm ki di kritik nora sak lé bon é sak lé mové, tout lé bon a prann. Na koz sak ski spass dann nout péi é dann lo monn, san priz de parti de kik se swa anndan-la napwin parti politik. Po sak i di zot i fé po kréol é nou wa pa, po linstan nou wa pa lo bann zaktivité. La radyo na pwin, si intèrnét par kont gout. Ni èspèr wa sanzé, dann in lavnir pross, la na in nafèr i fo fé sé ké lo CSA i zèt in koud-zyé si lo bann kayé désarzz sèrtin.
VVF.
aparaman sora pétèt sové, konsèy rézyonal trann war po trouv in solisyon.
Blokaz SRPP.
Kolèktiv bann travo plibli la blok lo, SRPP, dapré lo bann résponsab nora bann zaplikasyon kaziman konm bann zantiyé. Dann lo kour mwa avril po bann zéta zénéro wa arkoz plis...
Gomoune:
Zot wa di dann so ézinm niméro ké nou iyn kozé si domoune lé gro, mé sé in sizé daktialité é sora touzour! Fé in rézim fo avar lé mwayin, na domoune lé gro pars ké sé in kalité konmsala lé mi diré lé dann lo zinn liminm, la i déviyn dir po trété mé sanm la siyans lé posibl. Si ou vé fé in rézim lo méyèr solisyon sé adrèss aou dirèktoman sanm out mèdsin.
Konm mi di, si ou la pwin larzan lé dir, parské tout sak nou manz lé riss an grèss sirtou bann prodwi indistrièl. Ou pé pa manz riynk lé gim(lé sèr) épi out lorganis i domann bann protéine animal.
La parèss bann domoun i lèv dann la modèrnité i zwé osi in rol, koméla lé pli fasil, fé bann frit, ou sinonsa mèt in pla sirzélé dann lo four mikro-ond. Kwa il an swa la zénérasyon i lèv na d-sousi a fèr azot.
In lékzanpl 1 sasé sipss i kontiyn kaziman in vèr lwil. De tout fason nout péi la évoliyé tro vitt si lo plan alimantèr, nout kor la pa giny adapt ali, pars i fo inndé zénérasyon po kin lorganis i adap ali po paré, a bann nouvo molékil lé invanté dann lo dominn alimantèr.