Siklone déprésyon!
Arla ankor in nafèr nou lé abitiyé, mé solman dann tan avant té pa konm koméla. Kan navé siklone dolo navé la plass po pasé, mé koméla, sanm tout bann konstriksyon pli ou mwin fé dann la légalité.

Domoune la touzour krwar ké zot lé plifor travay bondiyé, i aranz ninport ousa, épi wa war apré. Si nou rogard biyn lévolisyon nout péi, konstriksyon i mank pa é vlé pa fini , sa lé fé an bordaz ravine sinon ousa dann tan lontan navé la ravine, si lo bor ranpar, é min dann ranpar. Depliss la plipar lotan la kalité napwin lé bann konstriksyon lé bazé si bann sistinm éropéin, sat zot ivé sé lo desing.

Sominn-si dann so mwa avril 2009 innt ti tanpèt pa tro for 400, 500 kilomètr lwin laba la kassé é détrui inndé zinfrastriktir,swadizan kosto. Si lété vréman in siklone sann ankor pliss la pli la noré war.
Tout fason lé kalkilé é na solisyon: zasiranss, déklarasyon zonn zinistré, kapar larzan po rofé lo minm zafèr. Prosinn vré koudvan, nawar koman sora.

Mouss ver?? mouss a vèr!

Arla ankor in fléo i komanss atak Larényon, po linstan nou antan pa bann politik mayé anndan po kozé, romark zot na pwin po ginyé po linstan. Sa sé in nafèr la pa koriz azot kan la anminn dann nout péi mèrl moris po swa dizan trouv in maniyèr po èd bann zagrikiltèr ,té anmèrdé, so zwao la i atak, nout fone é nout flor, lé anmèrdé ansann lé dévni in pèsst plito po détruir.

Arla sépa koman zot la inport bann mouss po swadizan détrui la vignn marone ( pokosa la pa prann domoué lé o somaz po travayé noré été pli fasil). Alor ké dann kaziman la mazorité bann péi i romoyin po protèz zot lanvironnman, isi i fé lo kontrèr, i fé bann tèss.

La trouv moyin anminn in mouss i sort déo po ésèy kal sak la natir i fé, san mazine konsékanss, lé vré zot la sort dann bann gran zékol, ou la giny inn ti plass par piston, pou minm pir zot lé la po tésté komann asèk kok lo péi.

So zafèr la i sava ankor kout larzan po trouv la solisyon, binn wi i fo biyn péyé mé si kisa i sarr pompé? Touzour sak i pèy zinpo é minm sak i pèy pa. I fodra fé biyn marss lizine Tipik, si ou vé pa mouss avèr i ponn dann out marmit. Apré bann kanpaynn dézinféktizasyon Sikounnkounia, sora in kanpaynn po tiyé mouss a vèr. Aforss tan pèz si la ké po war si i bouz ankor, zot wa giny dann dan.

Pa aryink domoune sa i touss mé osi bann zabèy, é dotr soz ankor!