Tou ski konsèrn lékolozi i si dann nout péi i dépann, pa solman la politik, pars mi wa pa bann parti, batay po lo lékolozi li minm.
Dann nout péi i devré ètr in devwar po tout sak i viv isi. Dann lafèr, fodré résponsabiliz bann domoune desi so nafèr la! Toulézour dann nout péi, bonpé i fé ninportkwé, i zèt nafèr inpé partou, i rèpèk pa. Malgré bann lwa lé anplas pèrsonn i réponsabiliz pa zot! A krwar ké la makotisité lé éréditèr.
Mi koz pa solman po bann kréol, mé osi po sak i sort déor. Nou antzann souvan dann nout péi domoun koz dési radyo po so problinm la, mé akoté riyn lé fé. Alon koz inn ti kou si nout péi si la natir nout péi. Ankor in sanss ké dann nout péi na ankor domoun i batay po sak i spass si ti bout la tèr Larényon. Lé pa évidan édik in moune lé né dann la makotisité, dann la plipar loka, lo réspé la natir lé pa réspèkté.
Kan mi di i fo rèspèk la natir, i fo pa koz sinpléman po bann domoun, i zèt la salté ninport ousa, mé osi sat i détrwi konm dann la foré lamazoni. Eské nora ankor la plass po bann piyé dobwa isi si so ti bout la tèr? Andiré domoun la pèr kan dann zot kour na tinn ti piyé dobwa, i fo zot i koup po ranplass par béton, tout bann promotèr lé présé po konstrwir, bann zimèb, la komine lé présé asté térin po in bousé d-pin po fé la plass po parking. Dann la plipar lo tan na pliss sirfass po gar loto , ké po domoun abité.